على هوى الخفاق عنّيت الأقدام
ولا نشدت القلب وشهي نواياه
مادام لي قلبٍ شجيعٍ وعزّام
ومادام سلم الطيب نهجه ومبداه
ودام الأمل باقي على كف الأيام
ما جابته سود الليالي قبلناه
لو إن قلبي فيه من وقته آلام
الصبر عاده للرجال المسماه
إن طولت دنياي مانيب منضام
من فضل من فاضت علينا عطاياه
أعيش عيشة حر جازم ومقدام
مع درب ربعٍ تكسب الطيب والجاه
أركض وأجيب أرقام وأحطم أرقام
ورجلي على درب المراجل مضراه
وإن مت، أنا مخلوق من جلد وعظام
يرحمني اللي كل خلقه ترجاه
يالله يا معطي جزيلات الأنعام
مدّك ، ولا مد الوجيه المهباه
الحلم ما ساعد مجمّعة الأحلام
واللي زرع له زرع يحسب لمجناه
والعمر زرع، وكل زرعٍ له حطام
ولا بد ماهوج العواصيف تذراه
والتجربه والدين للعاقل أخصام
يشوف بعيونه ويحسب خطاياه
والمرجلة وهبة ولا كل من رام
رجم المراجل شد حيله وعداه
والعز في رفقة مشاكيل وحشام
والجمر يونس حرّته من توطاه
الطير يالولا الجناحين ماحام
والحمل لولا عزمنا ما قويناه
والدين مفتاح الفرج دين الاسلام
ومنهج رسولٍ جاء لنا واتبعناه
ترى العمر يطوى مثل طيّة الخام
والرابح اللي سد دينه و وفاه
عيّنت ربع العام واللي ورى العام
أطيبهم اللي مابقى غير ذكراه
وحنا بعدهم والوعد حق قدام
يالله تغفر كل ذنبٍ جنيناه
وسلامتكم
تحيات^^الجرح ارحم^^
الثلاثاء نوفمبر 09, 2010 3:53 am
