يابوالخدودالمترفات الرقاقه
ياعين حرّ في طويل الشواهيق
ياللي شكى مم حمل عظم ساقه
إسمع كلام اللي حظوظه تخافيق
يا صاحبي ماعاد في القلب طاقه
على الهموم وغربةالروح والضيق
يا صاحبي والصبر مرّن مذاقه
وأنا تجرعته على نشفة الريق
ياأعز وأغلى من ربطني وثاقه
ماغيرك أحدن دثرته المعاليق
لك منزلٍ ما فيه مخلوق فاقه
ولك قيمةٍ فاقت جميع المخاليق
اصون ذكرك عن كلام الحماقه
وعن كلمة الشامت وحكي المطافيق
مديت لك كف الرضا والصداقه
وكتبت فيك من الفرايد طواريق
وقدمت لك من يانع الورد باقه
قصايدٍ كم رددوها العشاشيق
وعطيتني من كاس حبك ذواقه
وأنا عطيتك نبع قبلك فلا ذيق
وفتحت لك بين المحاديب طاقه
وصكيت في وجهي وساع الطواريق
أشفق على شوفك ووصلك شفاقه
وأثرك تحاول بالجفا و التفاريق
ما قبلك احدن هزني في فراقه
من راح عنّي جعل دربه توافيق
ما اسلك مساليك الدروب الدقاقه
أصبر لو إن الحمل ما شاله طويق
شف قلبي اللي زاد فيه اشتياقه
وشف دمعي اللي غرق الخد تغريق
حفظت عهد الحب والزين باقه
وأنا عليه غصون قلبي مدانيق
مير المنافق ما يسره نفاقه
تجيبه الأيام لا صار تحقيق
لكن لو دمي سريع احتراقه
العهد تحفظه الرجال المطاليق
بصون حبك لو قطعت العلاقه
وحنا عوايدنا نصون المواثيق
وسلامتكم
تحيات^^الجرح ارحم^^
الثلاثاء نوفمبر 09, 2010 3:50 am
